मला सुंदर दिसलेल्या ललना (२)…अभिनेत्र्या (हिंदी-२) ….

अभिनेत्र्या (हिंदी-२) ….

पहिला भाग वाचून काहींनी मला राहिलेल्या सुंदर चेहऱ्यांची आठवण करून दिली. येतील त्या पण, फक्तं त्या मला सुंदर दिसलेल्या हव्यात एवढीच अट  आहे. एक मात्रं  खरं की स्मिता पाटील आणि रेखा यांच्यावर मात्रं शेपरेट हवं यावर एकमत झालंय. एक सावळी एक काळी पण अग्रक्रमावर आहेत.  गोरं  होण्यासाठी  क्रीम  लावणाऱ्यानी हे  लक्षात  घ्यायला हरकत नाही. असो. 

झीनत अमानला सुंदर म्हणणं म्हणजे चष्मा लागला हे कन्फर्म. म्हणजे बघण्यासारखं होतं पण सुंदर वाटण्यासारख मात्र काही नाही. परवाच एक एसेमेस आला होता. बिग्गेस्ट लाय ऑफ ८०'ज - बिकीनितली झीनत म्हणतीये - 'क्या देखते  हो?'  आणि  फिरोज  खान  म्हणतो - 'सुरत तुम्हारी'... छे, एवढं  खोट  नाही  बाबा बोलता येणार मला. मग तिच्यापेक्षा परवीन बाबी सरस होती. देखणा चेहरा, लोभस हसणं आणि खानदानी सौदर्य. ती गोडच होती. नाही केला फार अभिनय तरी चालून जायचं. दोघींनाही अमिताभ बरोबर चित्रपट  मात्रं  चांगले मिळाले.  पण  नऊवारी  साडी,  नाकात नथ, अमिताभकडे मिस्किल  हसत  कौतुकानी  नाक मुरडत ठुमकत  चालणारी  'मच  गया  शोर सारी नगरी रे' मधली परवीन दृष्टं लागावी अशी देखणी दिसली. या सौंदर्यानेच तिचा घात केला हे दुर्दैव.

अशीच एक गोलमटोल - नीतू सिंघ. दो कलिया मधला चेहरा आणि अगदी काल परवाचा चेहरा बघा. वयाच्या सुरकुत्या  सोडा पण आनंदी, ग्रेसफुल चेहरा आहे तिचा. ती भिकारिण, गरीब घरातली वगैरे  वाटूच  शकत  नाही. सुखवस्तू घरातली  कुठलही टेन्शन नसलेली, आनंद देणारी, आनंदात  जगणारी  अशीच  दिसायची  ती.  तिच्याबद्दल कुठलीही अफवा उठल्याचं माझ्या ऐकीवात नाही. पडद्यावरचा तिचा वावर प्रसन्न होता. दिवार, याराना, धरम वीर, अमर अकबर, द ग्रेट ग्याम्ब्लर मधे ती आवडून गेली हे खरं.

मुख्यं अभिनेत्री नसलेली तरीही आवडलेली एक अभिनेत्री म्हणजे हेलन. हेलन रिचर्डसन, सलमानची सावत्र आई. थोडी काणी दिसणारी माणसं मस्त दिसतात. उदा. गौतम राजाध्यक्ष, अमिताभ … (सन्माननीय अपवाद आशा पारेख यांचा).  नृत्यं अंगात असावं लागतं, तो ह्रिदम मुळात हवा. हेलनकडे तो मुबलक होता. गोड चेहरा, मधाळ  हसणं  आणि  नाचताना देहभान हरपून नाचणं. मुंगडा मुंगडा असो नाहीतर अजून कुठलं कॅब्रे असो ती कधी चीप वाटली नाही. त्याचं कारण  तिच  अंग  प्रत्यंग  बघायला  वेळ  होताच  कुठे  इतकी  ती  विजेसारखी हलायची.  नुसते  आकार  उकार  बघायचे तर हल्लीचे आयटम  सॉंग  आहेत  पण  भन्नाट  डान्स  बघायचा  असेल  तर  मात्र  हेलनला स्पर्धाच नाही. गुमनाम मधे  गम  छोडके  मनाओ  रंगरेली, कारवा  मधे  पिया  तू अब तो आ जा, तिसरी  मंझील  मधे  शम्मी  वर जीव टाकणारी (शम्मी सारख्या  ह्रिदम  मास्टरनी  हेलन  सोडून  आशा  पारेख  निवडावी ? अर्थात  हेलनला  कोण  हिरोईन करणार!!!) दारासिंग बरोबर ती  चमकली  हिरोईन  म्हणून  पण  सगळे  बी  ग्रेड  चित्रपट.  आशा  भोसलेच्या आवाजात जे होतं ते हेलननी नृत्यात  दाखवलं आणि हेलनच्या अंगात जे होतं  ते  आशाबाईंनी  गळ्यातून  काढलं.  जो पर्यंत मिरवणुकी, वराती निघतील, गणेशोत्सव होतील तो पर्यंत ही तीन गाणी रहाणारच - भोली सुरत (सी.रामचंद्र), नाच रे मोरा (पु.लं.) आणि मुंगडा मुंगडा (राजेश रोशन) (दोन मराठी आहेत तिघातले :)). तिन्ही अगदी भिन्नं पण तीनही अजरामर आहेत. अजूनही मला मुंगडा लागलं की पिवळ्या चेक्सचा ब्लाउज आणि कोळी साडीतली,  मांडीवर  बाटली  टेकवून अमजदकडे सहेतूक बघणारी हेलन डोळ्यापुढे उभी रहाते, ती काय आवडल्याशिवाय का?

प्रसन्न, सात्विक, गोड अशी विशेषणं लावावीत असा एक सोज्वळ खानदानी चेहरा म्हणजे दुर्गा खोटे. बँ.लाडांची  ही लाडाकोडात वाढलेली घरंदाज मुलगी  खोट्यांच  घर सावरण्यासाठी  चित्रपटात  आली. अयोध्येचा राजा त्यांचा बहुतेक पहिला चित्रपट.  त्यांचे  फार  सिनेमे नाही पाहिलेले मी पण ज्यात त्या होत्या त्यात त्या  आवडल्या.  बावर्ची मधली उषाकिरण ची मोठी जाऊ, मुघल-ए-आझम  मधली जोधाबाई आणि बॉबी मधली मि. ब्रीगांझा. खळ्या काय शर्मिला, प्रिती झिंटा, गुल पनागला पण आहेत, दुर्गाबाईंच्या खळ्या मला लोभस आणि  प्रेमळ  वाटत  आल्या  आहेत.  बॉबीमधे  डिम्पलचा हात धरून अपमानित होऊन जाणा-या, ऋषी  कपूर  कडे  कौतुकानी पहाणा-या. वात्सल्य चेह-यावरून सांडतं नुसतं दुर्गाबाईंच्या…  बावर्चीमधे किती प्रेमळ दिसल्यात त्या. सास-यापुढे अदब, धाकट्या  जावेवरचं  प्रेम…  राजेश खन्नाकडे ज्या मायेने त्या बघतात तेंव्हा  वाटतं  अभिनय नाहीच…हा त्यांचा स्वभावच आहे. (त्यांचं  आत्मचरित्र  आहे, शोधून  वाचायचं  राहिलंय खरं). मुलगा  हरेन  खोटे  अकाली  गेल्यावर  सुनेचं  (आपल्या  विजया  मेहता)  लग्नं  लावून  देणारी  प्रेमळ माउली ती. त्यामुळे तर मला त्या जास्तच सुंदर दिसतात, आवडतात. एक  प्रेमळ  आजी  दिसते  मला त्यांच्यात. 

(पहिला भाग वाचून काहींना सुंदरता म्हणजे फक्तं चेह-यातली  सुंदरता  वाटली  असण्याची  शक्यता  आहे. पण गुणांनी, कर्तुत्वाने ही स्त्री सुंदर दिसते असं माझं ठाम मत आहे. तर पुन्हा भेटूया पुढच्या भागात, रूपाने कर्तुत्वाने आणि गुणांनी मला सुंदर दिसलेल्या ललना वाचायला.) 

--जयंत विद्वांस