समिंदराच्या किनारी, मउ रेतीत चांदणं चमचमतं,

ओल्या पाउलात, कुणाच्या माझं मन रमतं

दर्यावरती जातो भरतार माझा

घेउन येतो म्हावरा ताजा ताजा

उसळत्या दर्यात, उभारल्या शिडात,

पिसाटं बेभान वारं घुसतं.... माझं मन रमतं

वाट बघून थकतात डोळे माझे

मन कानोसा घेई पाउल वाजे

धडकत्या मनात, आतुरल्या डोळ्यात,

समिंदराचं पानी जमतं.... माझं मन रमतं

कशी येते फुलारून माझी काया

गडी मर्दानी सिंह माझा राया

पुनवेच्या रातीला, साजण साथीला

झालं गेलं ते पुन्हा स्मरतं.... माझं मन रमतं

जयंत विद्वांस